امریکی دبائو کے تحت اسرائیل کے ساتھ تعلقات استوارکرنے کے بعد سوڈان کی خود مختار فوجی کونسل کے سربراہ جنرل عبدالفتاح البرھان نے مصر کا دورہ کیا ہےجہاں اسرائیل کے ساتھ معاہدہ کرنے کے اعلان پر مصری حکومت نے ان کا خیرمقدم کیا۔
ذرائع کے مطابق مصری صدر عبدالفتاح السیسی اور سوڈانی خود مختار کونسل کے سربراہ عبدالفتاح البرھان کے درمیان ہونے والی ملاقات میں اسرائیل کے ساتھ تعلقات کے قیام، خطے کی صورت حال، النہضہ ڈیم پر جاری تنازع اور سوڈان میں پناہ لینے والے اخوان المسلمون کے رہ نمائوں کی قاہرہ کو حوالگی پر بات چیت ہوئی۔
اطلاعات کے مطابق سوڈان کی خود مختار عسکری کونسل نے مصر سے فرار کے بعد سوڈان میں پناہ لینے والے اخوان لیڈروں اور ارکان کو مصری حکومت کے حوالے کرنے پر اتفاق کیا ہے۔
ذرائع کے مطابق مصری صدر اور دیگر اعلیٰ حکام سے ملاقات کے دوران مصر سے فرار کے بعد سوڈان میں پناہ لینے والے اخوان عناصر اور ان کی قاہرہ کو حوالگی کے بارے میں بھی بات چیت کی گئی۔ اس حوالے سے سوڈانی لیڈر نے یقین دلایا کہ خرطوم آنے والے دنوں میں مصر کو مطلوب اخوان عناصر قاہرہ کے حوالے کرنے لے لیے اقدامات کرے گا۔
اس کے علاوہ دونوں رہ نمائوں کے درمیان عسکری، لاجسٹک اور اقتصادی تعاون کو فروغ دینے اور ایک دوسرے کے شہریوں کی آمد ورفت کو مزید آسان بنانے کے اوران کی سفری مشکلات دور کرنے پر بھی اتفاق کیا۔
منگل کے روز سوڈانی خود مختار کونسل کے سربراہ عبدالفتاح البرھان نے قاہرہ میں مصری صدر عبدالفتاح السیسی سے ملاقات کی تھی۔ اس ملاقات میں دونوں رہ نمائوں نے دو طرفہ دلچسپی کے امور پرتبادلہ خیال کیا تھا۔
