مقبوضہ بیت المقدس میں وادی الحلوہ انفارمیشن سینٹر کی طرف سے جاری کردہ ایک رپورٹ میں بتایا گیا ہے کہ ستمبر کے دوران اسرائیلی پولیس نے بیت المقدس کے 32 نمازیوں کو مسجد اقصیٰ سے بے دخل کیا۔ اس دوران قابض فوج اور پولیس نے روز مرہ کی بنیاد پر جاری کریک ڈائون میں 117 فلسطینیوں کو گرفتار کیا جب کہ بیت المقدس میں فلسطینیوں کے 22 مکانات مسمار کیے گئے۔
مرکزاطلاعات فلسطین کے مطابق وادی حلوہ انفارمیشن سینٹر کی رپورٹ کے مطابق بیت المقدس کی تمام کالونیوں میں اسرائیلی فوج کی طرف سے ستمبر میں روز مرہ کی بنیاد پر چھاپہ مار کارروائیوں کا سلسلہ جاری رہا۔ اس دوران 117 فلسطینیوں کو گرفتار کرکے زندانوں میں ڈالا گیا۔ان میں 19 بچے 3 خواتین اور درجنوں سابق اسیر شامل ہیں۔ سب سے زیادہ گرفتاریاں پرانے القدس شہر، العیسویہ اور سلوان کے مقامات سے کی گئیں۔
گذشتہ ماہ صہیونی حکام نے 32 فلسطینیوں کو مسجد اقصیٰ سے بے دخلی کے نوٹس جاری کیے۔ گذشتہ ماہ فلسطینیوں کی املاک کی مسماری کے ساتھ ساتھ القدس میں قائم مسجد القعقاع کو بھی شہید کیا گیا۔
