اسرائیلی وزیراعظم بنجمن نیتن یاھو کی کرپشن کے خلاف اور نیتن یاھو کے استعفے کے لیے احتجاج کرنے والوں پر انتہا پسند صہیونیوں نے حملہ کیا جس کے نتیجے میں متعدد مظاہرین زخمی ہوگئے۔
عبرانی ٹی وی چینل 12 کی رپورٹ کے مطابق ایک ہزار سے زاید مظاہرین تل ابیب میں داخلی سلامتی کے وزیر امیر اوحانا کی رہائش گاہ کے باہر جمع تھے اور وہ نیتن یاھو سے استعفے کے لیے احتجاج کررہے تھے۔ اس موقعے پر انتہا پسند صہہیونیوں کے ایک گروپ نے مظاہرین پر دھاوا بول دیا اور نہتے مظاہرین پر لاٹھیوں، لاتوں اور گھونسوں سے تشدد کیا۔ تشدد کے نتیجے میں متعدد صہیونی مظاہرین زخمی ہوگئے۔
خیال رہے کہ اسرائیل میں بلیک فلیگ نامی ایک تنظیم گذشتہ کئی ہفتوں سے نیتن یاھو کے خلاف احتجاج اور ان کے استعفے کے مطالبے کے لیے مظاہرے کررہی ہے۔
گذشتہ دنوں تل ابیب میں نیتن یاھو کی رہائش گاہ کے باہر سیکڑوں یہودیوں نے وزیراعظم سے استعفے کے لیے احتجاج کیا۔ اس موقعے پر قابض صہیونی ریاست کی پولیس نے مظاہرین پرحملہ کرکے 55 مظاہرین کو گرفتار کرلیا تھا۔
