قابض اسرائیلی حکام نے بدھ کے روزمغربی کنارے کے مختلف علاقوں میں متعدد فلسطینی املاک کو مسمار کرنے اور فلسطینیوں کی ملکیتی زمینوں کو ضبط کرنے کے احکامات جاری کیے۔
مقامی ذرائع نے کہا کہ قابض صہیونی حکام نے مغربی کنارے کے ضلع سلفیت میں رافت گاوں میں 15 ایکڑ فلسطینی زمین کو ضبط کرنے کا حکم دیا۔
رافت کی دیہاتی کونسل کے سربراہ حسیب عیاش نے کہا کہ متاثرہ زمینیں مرعی عیاش، ناشط عیاش اور محمود اصبع کی ملیکت ہیں۔
اسی دوران قابض صہیونی حکام نے طالکرم اور جنین شہروں کے درمیان فراسین قصبے میں 36 فلسطینی املاک کی مسماری کے احکامات جاری کیے۔
مقامی ذرائع نے کہا کہ اسرائیلی حکام کے عملے نے اسرائیلی فوجیوں کی مدد سے قصبے پر ہلہ بولا اور متعدد رہائشی عمارتوں ، زرعی املاک ، پانی کے کنووں اور دوسری املاک کے کام کو روکنے کے حکم نامے تقسیم کیے۔
