لبنان میں تعینات اقوام متحدہ کی امن فوج "یونیفل” نے اسرائیلی جنگی طیاروں کی جانب سے لبنان کی فضائی حدود کی مسلسل خلاف وررزیوں کی شدید مذمت کرتے ہوئے اسے سلامتی کونسل کی قرارداد 1701 اور لبنان کی خود مختاری کی کھلم کھلا خلاف ورزی قرار دیا ہے۔
مرکزاطلاعات فلسطین کے مطابق "یونیفیل” کے ترجمان جنرل اسٹیفانو ڈل کول نے لبنان کی سرکاری نیوز ایجنسی سے بات کرتے ہوئے کہا کہ اقوام متحدہ کی امن فوج کو لبنان کی فضائی حدود کی مسلسل خلاف ورزیوں اور اسرائیلی طیاروں کی طرف سے درندازی پر گہری تشویش ہے۔
جنرل ڈل کول نے کہا کہ یونیفیل نے یہ محسوس کیا ہے کہ صہیونی ریاست کے جنگی طیاروں نے لبنان کی فضائی حدود کی خلاف ورزیوں میں اضافہ ہوا ہے۔
خیال رہے کہ 11 اگست 2006ء کو لبنان اور اسرائیل کے درمیان اقوام متحدہ نے جنگ بندی کرائی تھی جس کے لیے ایک قرار داد منظور کی گئی۔ قرارداد نمبر 1701 میں دونوں فریقین سے مطالبہ کیا گیا ہے کہ وہ ایک دوسرے کی خود مختاری کا احترام کریں۔
