فلسطینی علاقوں میں کرونا کے نئے کیسز سامنے آنے کےبعد فلسطینی اتھارٹی کے وزیراعظم محمد اشتیہ نے کل ہفتے کے روز مقبوضہ مغربی کنارے میں الخلیل گورنری اور نابلس شہر کو مکمل طور پر بند کردیا ہے۔ وزیراعظم نے "کرونا” وائرس سے متاثرہ کیسز میں اضافے کے بعد ہر قسم کے اجتماع پر بھی پابندی عاید کی ہے۔ غرب اردن کے شہروں میں شادی بیاہ اور تعزیتی تقریبات کے انعقاد سے روک دیا گیا ہے۔
فلسطینی وزیراعظم محمد اشتیہ نے رام اللہ میں منعقدہ ایک پریس کانفرنس کے دوران کہا الخلیل گورنری کو مکمل طورپر سیل کردیا گیا ہے۔ ان کا کہنا تھا کہ الخلیل میں کرونا کے 49 کیسز سامنے آنے کے بعد علاقے کو سیل کیا گیا ہے۔ الخلیل میں کرونا کے مجموعی کیسز کی تعداد 258 ہوگئی ہے۔
انہوں نے مزید کہا کہ وہ گورنری کے اندر 5 دن کے لیے سفری پابندی عائد کریں گے تاکہ طبی عملے کو وبائی امراض پر قابو پانے میں مدد مل سکے۔اس موقعے پر صرف دن کے اوقات میں بیکریوں ، فوڈ اسٹورز ، فارمیسیوں اور فیکٹریوں کو کام کرنے کی اجازت دی جائے گی۔
وزیراعظم نے بتایا کہ غرب اردن کے شمالی شہر نابلس میں کرونا کے 48 نئے کیسز سامنے آئے ہیں جس کے بعد شہر کو سیل کردیا گیا ہے۔
انہوں نے تمام گورنریٹس میں ہر قسم کے اجتماع کو روکنے کا بھی فیصلہ کیا اور خلاف ورزی کرنے والوں کو سخت سزا دینے کی دھمکی دی ہے۔
لاک ڈائون کے دوران الخلیل اور نابلس میں شادی بیاہ اور تعزیتی تقریبات سمیت ہرطرح کے اجتماع پرپابندی عاید کردی گئی ہے۔
