اسلامی اوقاف کی طرف سے فلسطینی نمازیوں کے مسجد اقصیٰ میں نماز کی ادائی کی اجازت دینے کے بعد یہودی آبادکاروں کے قبلہ اول پر دھاووں کا سلسلہ بھی دوبارہ شروع ہوگیا ہے۔
ہفتے کی شام یہودی آباد کاروں کی بڑی تعداد نے مسجد اقصیٰ میں گھس کر تلمودی تعلیمات کے مطابق مذہبی رسومات ادا کیں۔
اس موقعے پر اسرائیلی فوج نے متعدد فلسطینی نمازیوں کو تشدد کا نشانہ بنانے کے ساتھ انہیں حراست میں لے لیا۔
عینی شاہدین کے مطابق ہفتے کے روز انتہا پسند یہودی مذہبی لیڈر یہودا گلیک کی قیادت میں 75 یہودی آباد کاروں نے قبلہ اول میں گھس کرتلمودی تعلیمات کی آڑ میں مذہبی رسومات ادا کیں۔
قبل ازیں مسجد اقصیٰ کی جگہ مزعومہ ہیکل سلیمانی کی تعمیر کی علم بردار تنظیموں نے یہودی آباد کاروں سے اپیل کی تھی کہ وہ زیادہ سے زیادہ تعداد میں جبل المکبر میں حاضری ہو کر اجتماعی مذہبی رسومات میں حصہ لیں۔
خیال رہے کہ یہودی آباد کار مسجد اقصیٰ کی جگہ جبل المکبر کی اصطلاح استعمال کرتے ہیں۔
