مسجد اقصیٰ کےامام اور خطیب الشیخ عکرمہ صبری نے خبردار کیا ہے کہ اسرائیلی ریاست کرونا وائرس کی آڑ میں القدس میں اپنے توسیع پسندانہ اور غاصبانہ منصوبوں کو آگےبڑھا رہا ہے۔
الشیخ صبری نے مزید کہا کہ القدس کے فلسطینی ایسے حالات میں ماہ صیام کا استقبال کررہے ہیں جب دوسری طرف کرونا کی وبا اور اسرائیلی ریاست کے القدس کو یہودیانے کے منصوبوں کی وبا ایک ساتھ جاری ہے۔
‘القدس کو درپیش کرونا اور اسرائیلی نسل پرستی کے چیلنج’ کے عنوان سے ایک سیمینار سے خطاب میں الشیخ عکرمہ صبری نے کہا کہ اسرائیل نے مسجد اقصیٰ کے ارد گرد جاسوسی کیمروں کا جال بچھا رکھا ہے۔ ان کیمروں کا مقصد مسجد اقصیٰ میں آنے والے نمازیوں پر نظر رکھنا اور انہیں ہراساں کرنا ہے۔
الشیخ عکرمہ صبری کا کہنا تھاکہ کرونا کی وبا پھیلنے کے بعد اسرائیلی ریاست، فوج اور یہودی آباد کاروں کی طرف سے القدس میں فلسطینیوں پرحملوں میں اضافہ کردیا ہے۔
انہوں نے عالم اسلام سے القدس کے دفاع کے لیے مربوط تزویراتی حکمت عملی وضع کرنے کی ضرورت پر زور دیا۔ فلسطینی عالم دین کا کہنا تھا کہ القدس کے دفاع کے لیے مسلمان اور مسیحی برادری کو متحد ہونا چاہیے۔
