سعودی حکومت کے ایک ذمہ دار ذریعے کا کہنا ہے کہ رمضان المبارک کے دوران کرونا کی وباء جاری رہنے کی صورت میں حرمین شریفین اور دوسری مساجد میں نماز تراویح پرپابندی لگ سکتی ہے۔ تاہم سعودی عرب کی حکومت کی طرف سے اس حوالے سے کوئی باضابطہ اعلان نہیں کیا گیا۔
سعودی عرب کے سرکاری ٹی وی چینل سے بات کرتے ہوئے سیکرٹری مذہبی امور محمد العقیل نے کہا کہ کرونا کی وباء جاری رہنے کی صورت میں ماہ صیام میں نماز تراویح میں خلل پیدا ہوسکتا ہے۔
جب ان سے پوچھا گیا کہ کرونا بیماری جاری رہنے کی صورت میں نمازیں جن میں نماز تراویح بھی شامل ہے متاثر ہوسکتی ہے تو ان کا کہنا تھا کہ بیماری جاری رہنے کی صورت میں ایسا ممکن ہے۔ ان کا کہنا تھا کہ ہم ایسی نماز کی اجازت نہیں دےسکتے جو کرونا جیسی مہلک بیماری پھیلانے کا باعث بنے۔
قبل ازیں حرمین شریفین کے سیکرٹری برائے امور صلواۃ احمد المنصوری نے ایک بیان میں کہا تھا کہ ماہ صیام میں نماز تراویح کی ادائی کے لیے ایک کمیٹی قائم کرنے کی کوشش کی جا رہی ہے۔
المنصوری کا کہنا تھا کہ ماہ صیام میں نمازوں سے متعلق کمیٹی کی طرف سے جاری کردہ سفارشات کو شاہ سلمان فوری طورپر منظور کریں گے۔
