فلسطینی محکمہ اوقاف اور القدس اسلامی امور نے کرونا وائرس کے خطرے کے پیش نظر مسجد اقصیٰ میں نماز اور دیگر شعائر کی ادائی روک دی ہے۔
مرکزاطلاعات فلسطین کے مطابق فلسطینی محکمہ صحت کی طرف سے جاری کردہ ہدایات پرعمل درآمد کرتے ہوئے مسجد اقصیٰ میں نماز کی ادائی پرعارضی طور پرپابندی عاید کی ہے۔
فلسطینی اوقاف کونسل کی طرف سے جاری ایک بیان میں کہا گیا ہے کہ القدس اور فلسطین کے دوسرے علاقوں میں موجود تمام مساجد میں عارضی طورپر با جماعت نماز کی ادائیگی روکنے کا فیصلہ کیا گیا ہے۔ اس فیصلے پرکل سوموار کےروز سے عمل درآمد شروع کردیا گیا ہے۔
بیان میں مزید کہا گیا ہے کہ تمام فلسطینی مساجد میں کل سوموار سے مساجد میں با جماعت نمازوں کی ادائیگی روک دی گئی ہے۔ تاہم مسجد اقصیٰ کی انتظامی امور کے عہدیدار اور ذمہ داران اپنی ڈیوٹی انجام دیتے رہیں گے۔
خیال رہے کہ فلسطینی اتھارٹی نے غرب اردن کے علاقوں میں 60 فلسطینیوں کے کرونا کا شکار ہونے کی تصدیق کی ہے جب کہ اسرائیل میں کرونا وائرس کے متاثرین کی تعداد 1300 تک جا پہنچی ہے۔
