قابض اسرائیلی فوج نے مسجد اقصیٰ کے ڈائریکٹرالشیخ عمرالکسوانی کو حراست میں لینے کے بعد ان سے مسجد اقصیٰ میں بہ جماعت نماز کی ادائی پر پوچھ تاچھ کی ہے۔
مرکزاطلاعات فلسطین کے مطابق اسرائیلی ملٹری پولیس نے جمعرات کے روز الشیخ عمر الکسوانی کو بیت المقدس میں ان کی رہائش گاہ سے حراست میں لیا اور انہیں حراست میں لینے کے بعد القشلہ حراستی مرکزمنتقل کیا گیا۔ وہاں انہیں کئی گھنٹے حبس بے جا میں رکھا گیا اور ان سے مسجد اقصیٰ میں اسرائیلی پابندی کے باوجود با جماعت نماز ادا کرنے پر پوچھ گچھ کی گئی۔
الشیخ عمر الکسوانی کا کہنا تھا کہ ان سے مسجد اقصیٰ میں اذان دینے اور نمازوں کے قیام کے بارے میں سوالات کیے گئے اور کہا گیا کہ مسجد اقصیٰ میں نماز جمعہ کی ادائی پرپابندی عاید کی جائے۔
قبل ازیں اسرائیلی فوج نے بیت المقدس میں الثوری کالونی میں ایک کارروائی کے دوران متعدد فلسطینیوں کو حراست میں لے لیا۔ اسرائیلی فوج نے العیساویہ کے مقام پر کارروائی کے دوران 14 سالہ مجد محمود کو حراست میں لے لیا۔
