فلسطین میں انسانی حقوق کے کارکنوں کاکہنا ہے کہ رواں سال کے دوران غزہ کی مشرقی اور شمالی سرحد سے اسرائیلی فوج نے 14 فلسطینیوں کو حراست میں لیا۔
فلسطینی امور اسیران کے مندوب عبدالناصر فروانہ نے گذشتہ روزایک بیان میں کہا کہ رواں سال کے دوران اب تک غزہ اور سنہ 1948ء کے مقبوضہ علاقوں کے درمیان اسرائیلی فوج نے 14 فلسطینیوں کو گرفتار کیا۔
گذشتہ روز بھی اسرائیلی فوج نے غزہ کی سرحد سے دو فلسطینیوں کی گرفتاری کا دعویٰکیا اور ساتھ ہی کہا ہے کہ وہ بموں اور دستی ہتھیاروں سے لیس تھے۔
انہوں نے بتایا کہ صہیونی فوج غزہ کی سرحد سے پکڑے گئے فلسطینیوں کو گرفتار کرکے انہیں وحشیانہ تشدد کا نشانہ بناتی ہے۔
انسانی حقوق کے کارکن نے بتایا کہ گذشتہ برس اسرائیلی فوج نے غزہ کی مشرقی اور شمالی سرحد سے 84 فلسطینیوں کو حراست میں لیا۔
