برادر مسلمان عرب ملک قطر نے غزہ کی پٹی میں جمعرات کے روز آتش زدگی کے واقعے میں شہید اور زخمی ہونے والے فلسطینی خاندانوں کے بحالی کے لیے دو ملین ڈالر کی فوری ہنگامی امداد کا اعلان کیا ہے۔
مرکزاطلاعات فلسطین کے مطابق گذشتہ روز اسلامی تحریک مزاحمت’حماس’ کے سیاسی شعبے کے سربراہ اسماعیل ھنیہ نے امیر قطر الشیخ تمیم بن حمد سے ٹیلفیون پر بات چیت کی۔ اس موقعے پر اسماعیل ھنیہ نے امیر قطر کو غزہ میں آتش زدگی کے سانحے اور اس کے نتیجے میں ہونے والے جانی نقصان کے بارے میں بتایا۔
خیال رہے کہ جمعرات کے روز وسطی غزہ میں النصیرات پناہ گزین کیمپ میں آتش زدگی کے واقعے میں کم سے کم 10 فلسطینی شہید اور 60 زخمی ہو گئے تھے۔
ٹیلیفون پر بات کرتے ہوئے امیر قطر نے غزہ میں آتش زدگی کے سانحے میں متاثر ہونے والے فلسطینیوں کی بحالی کے لیے فوری طورپر 2 ملین ڈالر کی امداد فراہم کرنے کا اعلان کیا۔ اسماعیل ھنیہ نے امیر قطر کی طرف سے غزہ میں آتش زدگی کے متاثرین کے لیے دل کھول کرامداد فراہم کرنے کے اعلان پرامیر قطر کا خصوصی شکریہ ادا کیا۔
