روس کے دورے پرآئے اسلامی تحریک مزاحمت’حماس’ کے اعلیٰ اختیاراتی وفد نے اسماعیل ھنیہ کی قیادت میں روس کی اسلامی کونسل کی قیادت سے ملاقات کی۔
حماس کے ایک ذمہ دار ذریعے نے مرکزاطلاعات فلسطین کو بتایا کہ جماعت کے سیاسی شعبے کے سربراہ اسماعیل ھنیہ کی قیادت میں جماعت کے ایک وفد نے ماسکو میں اسلامی کونسل کی قیادت سے ملاقات کی۔ اس ملاقات میں روسی اسلامک کونسل کو قضیہ فلسطین کی تازہ صورت حال سے آگاہ کیا اور فلسطینی قوم کو درپیش چیلنجز سے نمٹنے کے حوالے سے کی جانے والی مساعی پر تبادلہ خیال کیا گیا۔
ملاقات میں حماس کے سیاسی شعبے کے نائب صدر صالح العاروری، خارجہ امور کے انچارج ڈاکٹر ماھر صلاح اور ڈاکٹر موسیٰ ابو مرزوق بھی موجود تھے۔
قبل ازیں حماس کی قیادت نے اسماعیل ھنیہ کی قیادت میں جماعت کے ایک اعلیٰ اختیاراتی وفد نے ماسکو میں روسی وزیر خارجہ سیرگئی لافروف، نائب وزیر خارجہ میخائل بوگدانوف اور دیگر عہدیداروں سے ملاقات کی۔
