قابض اسرائیلی فوج کے ہاتھوں غزہ کی پٹی میں ایک فلسطینی کو شہید کرنے کے بعد اس کی لاش کی بے حرمتی کے واقعے پر یورپی یونین نے صہیونی ریاست کو کڑی تنقید کا نشانہ بنایا ہے۔ یورپی یونین کے القدس میں مندوب سفین کوھان وون بورگسڈورف نے کہا کہ ایک فلسطینی نوجوان کو شہید کرنے کے بعد اس کی لاش کی جس طرح اسرائیلی فوج نے بے حرمتی کی اس کا کوئی جواز نہیں۔ یہ اقدام انسانیت کی عزت و توقیر کے اصولوں کی توہین ہے۔
انہوں نے کہا کہ ایک فلسطینی شہید کی لاش کو اسرائیلی فوج نے جس طرح بلڈورز کے ساتھ گھیسٹا اور اسے لٹکا کر اٹھایا وہ منظر کسی کے لیے قابل قبول نہیں ہے۔
یورپی مندوب کا کہنا تھا کہ اسرائیلی فوج فلسطینیوں کے ساتھ جس طرح کا برتائو کررہی ہے وہ انسانی عزت اور انسانیت کے احترام کی کھلی توہین کےمترادف ہیں۔ اب وقت آگیا ہے کہ غزہ کی پٹی کے عوام کی مشکلات کم کی جائیں اور ان کے خلاف جاحیت کی روک تھام کی جائے۔
خیال رہے کہ حال ہی میں اسرائیلی فوج نے غزہ کی پٹی کے جنوبی شہر خان یونس میں ایک فلسطینی محمد الناعم کو شہید کرنے کے بعد اس کے جسد خاکی کی منظم انداز میں بے حرمتی کی قابض فوج نے شہید کی لاش کو بلڈورز مشین کی مدد سے گھیسٹا اور اسے لٹکا کر ایک ٹینک میں پھینک دیا گیا۔
