عرب لیگ نے مقبوضہ مغربی کنارے کے جنوبی تاریخی شہر الخلیل میں مقدس مقامات کے تحفظ اور فلسطینیوں کے خلاف اسرائیلی جرائم کی روک تھام کے لیے بین الاقومی امن فوج کے دستے تعینات کرنے کا مطالبہ کیا ہے۔
مرکز اطلاعات فلسطین کے مطابق الخلیل شہر میں مسجد ابراہیمی میں 25 فروری کو نمازیوں کے قتل عام کی 26 برسی کے موقع پر جاری ایک بیان میں عرب لیگ نے کہا ہے کہ مسجد ابراہیمی اور الخلیل شہر کے دیگر مقدس مقامات اب بھی خطرے میں ہیں۔ ان کے تحفظ اور دفاع کے لیے عالمی امن فوج تعینات کی جائے۔
عرب لیگ کے فلسطین ڈیسک کے انچارج ابو علی نے کہا کہ اسرائیلی ریاست کی شرانگیز مہم جاری ہے اور الخلیل شہر کو یہودیانے کی منظم کوششیں کی جا رہی ہیں۔ مسجد ابراہیمی میں فلسطینی مسلمانوں کو نماز اور عبادت کی ادائی سے محروم رکھا جا رہا ہے۔
انہوں نے اقوام متحدہ سے اپیل کی کہ وہ چوتھے جنیوا کنونشن پرعمل درآمد یقینی بنانے اور اسرائیلی ریاست کے جرائم کی روک تھام کے لیے مناسب میکانزم اختیار کرے تاکہ فلسطینیوں کے خلاف صہیونی ریاست کی روز مرہ کی بنیاد پر جاری دہشت گردانہ کارروائیوں کی روک تھام کی جاسکے۔
عرب لیگ کے عہدیدار نے سنہ 1967ء کی جنگ میں قبضے میں لیے گئے تمام فلسطینی علاقے خالی کرنے اور مشرقی بیت المقدس پر مشتمل فلسطینی ریاست کے قیام کا مطالبہ کیا۔
خیال رہے کہ 25 فروری 1994ء کو ایک یہودی دہشت گرد گولڈ چائن نے مسجد ابراہیمی میں گھس کر نماز فجرکی ادائی میں مصروف 29 نمازیوں کو بے دردی کے ساتھ شہید اور 150 کو زخمی کردیا تھا۔
