ترکی نے مقبوضہ بیت المقدس میں اسرائیل کی دو یہودی کالونیوں میں مزید ہزاروں کی تعداد میں مکانات کی تعمیر کے اعلان کی شدید مذمت کرتے ہوئے اسے مسترد کردیا ہے۔
مرکزاطلاعات فلسطین کے مطابق ترکی کی وزارت خارجہ کی طرف سے جاری ایک بیان میں کہا گیا ہے کہ اسرائیلی وزیراعظم کا القدس میں یہودی کالونیوں میں مزید ہزاروں کی تعداد میں گھروں کی تعمیر کا اعلان ناقابل قبول ہے۔ اس اعلان سے اسرائیلی ریاست کی فلسطینی سرزمین پر غاصبانہ قبضے کو وسعت دینے کی ذہنیت کی عکاسی ہوتی ہے، مگر اسرائیل کا یہ طرز عمل حقائق کو تبدیل نہیں کرسکتا۔
خیال رہے کہ گذشتہ جمعرات کو اسرائیلی وزیراعظم بنجمن نیتن یاھو نے بیت المقدس میں ایک تقریب سے خطاب میں شہر میں قائم دو یہودی کالونیوں میں مزید پانچ ہزار دو سو مکانات کی تعمیر کا اعلان کیا تھا۔
بیان میں کہا گیا ہے کہ اسرائیلی ریاست بین الاقوامی قوانین اور اقوام متحدہ کی قراردادوں کو دیوار پر مار رہا ہے۔
