اسرائیلی ریاست کے عبرانی ذرائع ابلاغ نے بتایا ہے کہ فلسطینی اتھارٹی اور اسرائیل کے درمیان جاری تجارتی جنگ ختم ہوگئی ہے اور فریقین نے اس حوالے سے ایک دوسرے کے ساتھ ہرممکن تعاون کا یقین دلایا ہے۔
اسرائیل کے عبرانی ریڈیو نے حال ہی میں فلسطینی اتھارٹی نے اسرائیل سے مویشیوں کی خریداری بند کردی تھی جب کہ اس کے جواب میں اسرائیل نے فلسطینی اتھارٹی کے زیرانتظام علاقوں سے سبزیوں کی خریداری روک دی تھی۔ فریقین کے درمیان جاری رہنے والے اختلافات کے بعد اب اسرائیل اور فلسطینی اتھارٹی نے تجارتی جنگ ختم کردی ہے۔
عبرانی ریڈیو کے مطابق اسرائیل کی طرف سے فلسطینی اتھارٹی کو مویشیوں، پھلوں اورسبزیوں کی خرید و فروخت پر عاید کی گئی پابندی ختم کردی ہے۔ اس پابندی کے خاتمے کے بعد فلسطینی اتھارٹی غرب اردن کو سبزیوں کی فروخت شروع کرسکے گی۔
خیال رہے کہ گذشتہ 28 جنوری کو امریکا کی طرف سے مشرق وسطیٰ کے لیے مجوزہ منصوبے سنچری ڈیل کے اعلان کے بعد فلسطینی اتھارٹی اور اسرائیل کے درمیان کشیدگی پیدا ہوگئی تھی۔ فلسطینی اتھارٹی نے اسرائیلی ریاست کے بائیکاٹ کا اعلان کردیا تھا۔
