فلسطین کے مقبوضہ مغربی کنارے میں یہودی آباد کاری کے خلاف فلسطینیوں کی طرف سے نکالی گئی پر امن ریلیوں پر صہیونی فوج نے طاقت کا وحشیانہ استعمال کیا ہے جس کے نتیجے میں درجنوں فلسطینی زخمی جب کہ آنسوگیس کی شیلنگ سے کئی بے ہوش ہوگئے۔
مقامی فلسطینی ذرائع نے بتایا کہ مقبوضہ مغربی کنارے کے جنوبی شہر الخلیل میں صوریف کے مقام پر فلسطینیوں کی بڑی تعداد نے یہودی آباد کاری کے خلاف جلوس نکالا۔ اسرائیلی فوج نے فلسطینی مظاہرین اور ان کی کوریج کرنے والے صحافیوں کو بھی براہ راست گولیوں کا نشانہ بنایا اور ان پرآنسوگیس کی شیلنگ کی جس کے نتیجے میں درجنوں فلسطینی زخمی اور بے ہوش ہوگئے۔
اس موقع پر اسرائیلی فوج کےحملے میں صحافی معاذ عمارنہ اور متعدد دیگر صحافی اور فوٹوگرافر زخمی ہوگئے۔
عینی شاہدین نے بتایا کہ قابض فوج نے مظاہرین پراندھا دھند آنسوگیس کی شیلنگ کی اور ان پر گولیاں چلانے کے ساتھ لاٹھی چارج کیا جس کھے نتیجے میں درجنوں مظاہرین زخمی ہوگئے۔
ادھر فلسطینیوں کی بڑی تعداد نے صوریف کے مقام پر عصیون یہودی کالونی کے بالمقابل القرینات قصبے میں فلسطینی اراضی پر نماز جمعہ ادا کی۔ قابض فوج نے اس جگہ پرقبضے کے نوٹس جاری کر رکھے ہیں۔
ادھر مغربی نابلس میں کفر قدوم کے مقام پر اسرائیلی فوجیوں نے یہودی آباد کاری کے خلاف فلسطینی جلوس پر آنسوگیس اور صوتی بم استعمال کیے۔
