مشرق وسطیٰ کے لیے اقوام متحدہ کے خصوصی ایلچی نے غزہ کی پٹی کے دورے کے دوران اسلامی تحریک مزاحمت’حماس’ کے سیاسی شعبے کے سربراہ اسماعیل ھنیہ سے ملاقات کی۔ دونوں رہ نمائوں کے درمیان اسرائیلی فوج کی ریاستی دہشت گردی اور فلسطین میں انتخابات کےحوالے سے ہونے والی تیاریوں پر تبادلہ خیال کیا گیا۔
مشرق وسطیٰ کے لیے اقوام متحدہ کے خصوصی ایلچی نیکولائے میلاڈینوف نے فلسطین کے جنگ زدہ علاقے غزہ کی پٹی کے دورے کے دوران اسلامی تحریک مزاحمت’حماس’ کی قیادت سے ملاقات کی ہے۔ ان کا کہنا ہے کہ حماس کی طرف سے انتخابات میں حصہ لینے کا اعلان خوش ائند اور قابل تعریف ہے۔
مرکزاطلاعات فلسطین کے مطابق حماس کی طرف سے جاری کردہ ایک بیان میں کہا گیا ہے کہ اقوام متحدہ کے خصوصی ایلچی نے غزہ کی پٹی میں جماعت کے مرکزی دفتر کے دورے کے دوران جماعت کی قیادت سے ملاقات کی۔ اس ملاقات میں فلسطین کی موجودہ صورت حال بالخصوص غزہ کی پٹی میں معاشی مسائل، فلسطینیوں کےدرمیان پائے جانے والے اختلافات اور دیگر امور پر تبادلہ خیال کیا گیا۔
میلاڈینوف نے حماس کی طرف سے انتخابات میں حصہ لینےکے اعلان کو سراہا اور کہا کہ انتخابی عمل کو کامیاب بنانے میں جماعت کلیدی کردار ادا کرسکتی ہے۔
انہوں نے فلسطینی دھڑوں میں پائے جانے والے اختلافات دور کرنے کی ضرورت پر زور دیا۔
حماس کے سیاسی شعبے کے سربراہ اسماعیل ھنیہ کی طرف سے بھی حماس کے جمہوری اور سیاسی عزم کی تحسین کو سراہا۔
