جمعه 07/فوریه/2025

شام کے علاقے تل ابیض میں بم دھماکے میں 10 افراد ہلاک

اتوار 3-نومبر-2019

شام کے شمال مغربی صوبہ ادلب میں روسی فوج کے ایک فضائی حملے اور سرحدی قصبے تل ابیض میں کاربم دھماکے میں کم سے کم 10 افراد ہلاک ہو گئے ہیں۔

ترکی کی وزارتِ دفاع نے ہفتے کے روزایک بیان میں کہا ہے کہ تل ابیض میں بم دھماکے میں متعدد عام شہری ہلاک اور بیس زخمی ہوئے ہیں۔اس نے کرد جنگجوؤں پر اس بم دھماکے کا الزام عاید کیا ہے۔تل ابیض پر ترکی کی سکیورٹی فورسز کا کنٹرول ہے اور انھوں نے گذشتہ ماہ وہاں سے کرد ملیشیا وائی پی جی کے زیر کمان شامی جمہوری فورسز(ایس ڈی ایف) کو نکال باہر کیا ہے۔

برطانیہ میں قائم شامی رصدگاہ برائے انسانی حقوق نے اس بم دھماکے میں 14 افراد کی ہلاکت کی اطلاع دی ہے اور اس نے کہا ہے کہ ان میں ترکی نواز شامی باغی بھی شامل ہیں۔

رصدگاہ کی ایک اور اطلاع کے مطابق صوبہ ادلب کے جنوب میں واقع گاؤں جبلہ پر روس کے ایک فضائی حملے میں چھے شہری مارے گئے ہیں۔ ان تمام کا تعلق ایک ہی خاندان سے تھا۔رصدگاہ نے اس فضائی حملے کا تعیّن پرواز کے انداز ، طیارے اور بمباری میں استعمال کیے گئے بارود سے کیا ہے۔

اس تنظیم کے ڈائریکٹر رامی عبدالرحمان کا کہنا ہے کہ روس کا31 اگست کو ادلب میں اعلانِ جنگ بندی کے بعد یہ سب سے تباہ کن فضائی حملہ ہے۔قبل ازیں اسی صوبے میں روس فضائی حملوں میں آٹھ اور شہری بھی ہلاک ہوچکے ہیں۔

واضح رہے کہ ادلب میں قریباً تیس لاکھ افراد رہ رہے ہیں۔اس صوبے پر اس وقت ماضی میں القاعدہ سے وابستہ تنظیم کی قیادت میں مختلف باغی گروپوں کا کنٹرول ہے اور یہاں شام کے دوسرے صوبوں سے بھی اہلِ سُنت کی آبادی کو لابسایا گیا ہے۔

مختصر لنک:

کاپی