اسرائیلی جیل میں انتظامی حراست کے خلاف بہ طور احتجاج فلسطینی شہری خذیفہ حلبیہ کی بھوک ہڑتال کے 50 روز مکمل ہوگئے ہیں جس کے بعد بھوک ہڑتال کا آج اکاون واں دن ہے۔
مرکزاطلاعات فلسطین کے مطابق کلب برائے اسیران کی رپورٹ میں بتایا گیا ہے کہ 28 سالہ خذیفہ حلبیہ کا تعلق مقبوضہ بیت المقدس کے نواحی علاقے القدس کے ابو دیس کےعلاقے سے ہے۔ سنہ 2013ء کے بعد انہیں تین بار انتظامی حراست کی پالیسی کی تحت گرفتار کیا جا چکا ہے۔ سنہ 2013ء، 2014ء اور 2018ء میں وہ کئی کئی ماہ تک صہیونی زندانوں میں انتظامی قید کی پالیسی کے تحت پابند سلاسل رہ چکے ہیں۔
آخری گرفتاری کے بعد انہیں اب تک ان کی انتظامی قید میں تین بار توسیع کی جا چکی ہے۔ پہلی بار انہیں چھ ماہ، اس کے بعد چار چار ماہ قید کی سزا سنائی گئی۔
اسیر حلبیہ خون کے کینسر کے مریض ہیں۔ ان کے ہاں چھ ماہ قبل بچی پیدا ہوئی تو وہ جیل میں ہی تھے۔
