فلسطینی وزارت اوقاف کی طرف سے جاری کردہ ایک بیان میں کہا گیا ہے کہ مارچ 2019ء کے دوران یہودی آباد کاروں نے مسجد اقصیٰ اور الخلیل شہر میں واقع مسجد ابراہیمی پر 100 حملے کیے اور مقدس مقامات کی بے حرمتی کی۔
مرکز اطلاعات فلسطین کے مطابق وزارت اوقاف کی طرف سے جاری بیان میں کہا گیا ہے کہ مارچ کے دوران یہودی آباد کاروں نے مسجد اقصیٰ کی 56 بار بے حرمتی کی جب کہ مسجد ابراہیمی میں 53 بار اذان دینے پر پابندی عاید کی گئی۔
بیان میں مزید کہا گیا ہے کہ صہیونی دشمن کی طرف سے مقدس مقامات کے خلاف جنگ جاری ہے۔ مارچ کے دوران یہودی آباد کاروں اور اسرائیلی فوج نے القدس میں مسجد اقصیٰ کے باب رحمت کی دو بار بے حرمتی کی۔
بیان میں خبردار کیا گیا ہے کہ اسرائیلی حکام نے بیت المقدس کی درجنوں دینی اور قومی شخصیات کو مسجد اقصیٰ سے بے دخل کیا۔ ان میں قبلہ اول کے محافظ بھی شامل ہیں۔
اسی دوران یہودی انتہا پسند گروپوں کی طرف سے فلسطینیوں کے خلاف اشتعال انگیز مہمات شروع کی ہیں۔
یہودی آباد کار غرب اردن میں سلفیت اور دوسرے مقامات پر موجود تاریخی مقامات پر دھاوے بولتے رہے۔
