انڈونیشیا کے امدادی کارکنوں اور رضاکاروں پر مشتمل ایک وفد نے گذشتہ روز فلسطین کے جنگ سے تباہ حال علاقے غزہ کی پٹی کا دورہ کیا۔ اپنے اس دورے کے دوران انہوں نے غزہ کی پٹی میں مختلف تنظیموں کی قیادت سے ملاقات کے ساتھ ساتھ جنگ سے متاثرہ علاقوں کے دورے کا اعلان کیا ہے۔
مرکزاطلاعات فلسطین کے مطابق انڈونیشیا کے امدادی کارکنوں کا یکجہتی وفد گذشتہ روز رفح گذرگاہ سے غزہ داخل ہوا جہاں وفد کا فلسطینی وزارت خارجہ کے ہیڈ کواٹر میں استقبال کیا گیا۔
فلسطینی وزارت خارجہ کے سیکرٹری غازی حمد اور شعبہ تعلقات عامہ کے ڈائریکٹر حسام الدجنی نے انڈونیشی مہمانوں کا استقبال کیا۔ وفد کو ایک قافلے کی شکل میں رفح گذرگاہ سے غزہ میں وزارت خارجہ کے دفتر میں لایا گیا۔ وفد میں 33 امدادی کارکن شامل ہیں۔ انہوں نے گذشتہ روز انڈونیشیا کی جانب سے قائم کردہ اسپتال کا بھی دورہ کیا اور مریضوں کو درپیش طبی مشکلات کا جائزہ لیا۔
