اسرائیل کے عبرانی ذرائع ابلاغ کے مطابق امریکا نے عرب ممالک پر زور دیا ہے کہ وہ اقوام متحدہ میں اسلامی تحریک مزاحمت "حماس” کی مذمت اور فلسطینیوں کی مسلح جدو جہد کے خلاف قرارداد کی حمایت کریں۔
اسرائیلی اخبار "ہارٹز” نے اپنی رپورٹ میں بتایا ہے کہ امریکا کے مشرق وسطیٰ کے لیے مندوب جیسن گرین بیلٹ نے نو عرب ممالک کے سفیروں کو مکتوب ارسال کیا ہے جس میں ان ممالک پر زور دیا گیا ہے کہ وہ فلسطینی تنظیم حماس کے خلاف جنرل اسمبلی میں پیش کی جانے والی قرارداد کی حمایت کریں۔
اخبار کے مطابق جیسن گرین بیلٹ نے مراکش، اومان، بحرین، اردن، سعودی عرب، کویت،امارات، مصر اور قطر سے کہا ہے کہ وہ حماس کے خلاف جنرل اسمبلی میںپیش کی جانے والی قرارداد کی حمایت کریں۔
مکتوب میں کہا گیا ہے کہ فلسطینی اتھارٹی کی طرف سے قرارداد کی مخالفت بلا جواز ہے کیونکہ فلسطینی اتھارٹی بھی حماس کو دشمن قرار دیتی ہے۔
اسرائیلی اخبار نے امریکی انتظامیہ کے ذرائع کےحوالےسے لکھا ہے کہ گرین بیلٹ نے عرب ممالک سےکہا ہے کہ وہ دہشت گردی کے خلاف جنگ میں امریکا کے حامی ہیں۔ اس لیے ان کے پاس حماس کے خلاف قرارداد کی حمایت نہ کرنے کا کوئی جواز نہیں کیونکہ امریکا کے بہ قول حماس بھی اسرائیل کے خلاف دہشت گردی کی مرتکب ہے۔
امریکا نے یورپی ممالک کو بھی قرارداد کی حمایت پر قایل کرنے کی کوشش کی اور عرب ممالک کی حمایت کے حصول کے لیے قرارداد کے مسودے میں تبدیلی کی گئی ہے۔ قرارداد میں فلسطینی دھڑوں میں مصالحت اور غزہ کو فلسطینی اتھارٹی کی عمل داری میں دیے جانے کا بھی مطالبہ کیا گیا۔
