فلسطین کے مقبوضہ مغربی کنارے کے جنوبی شہر الخلیل میں نوجوانوں کے ایک گروپ نے مسجد ابراہیمی میں نمازیوں کی تعداد میں اضافے کی منفرد مہم شروع کی ہے۔
"یلا نمشی للحرم” (حرم کی طرف چلیے) کے عنوان سے یہ مہم ایک مقامی یوتھ گروپ کی جانب سے شروع کی گئی ہے۔ اس کا مقصد الخلیل شہر کے فلسطینی مسلمانوں کو مسجد ابراہیمی میں نماز کے لیے لانے کے لیے کی کوشش کرنا ہے۔
گروپ کی جانب سے جاری کردہ ایک بیان میں بتایا گیا ہے کہ ہمارا مقصد مسجد ابراہیمی میں نمازیوں کی تعداد میں اضافہ کرنا اور یہودی آباد کاروں کے دھاووں کی راہ روکنا ہے۔
بیان میں کہا گیا ہے کہ فلسطینی مسلمانوں کو بلا خوف مسجد ابراہیمی میں نماز کی ادائی کے لیے حاضر ہونے کی کوشش کرنی چاہیے۔
خیال رہے کہ مسجد ابراہیمی صہیونی ریاست اور یہودی آباد کاروں کی منظم شرانگیزی کا سامنا کررہی ہے۔ یہودی آباد کار روزانہ کی بنیاد پر مسجد میں گھس کر مذہبی رسومات ادا کرتے اور مسلمان نمازیوں کو ہراساں کرتے ہیں۔
