لبنان مزاحمتی تنظیم حزب اللہ کے سربراہ حسن نصراللہ نے کہا ہے کہ اسرائیل نے لبنان پر حملے کی حماقت کی تو اسے اس کا منہ توڑ جواب دیا جائے گا۔ ان کا کہنا تھا کہ لبنان کی سزمین کو دشمن کے پائوں تلے روندنے کی کسی صورت میں اجازت نہیں دی جائے گی۔
مرکزاطلاعات فلسطین کے مطابق "یوم شہداء حزب اللہ ” کے حوالے سے ایک تقریب سے خطاب میں کہا کہ دھمکیاں، دبائو اور پابندیاں ہمارا راستہ نہیںروک سکتیں اور نہ ہی حزب اللہ کو مزاحمت سے باز رکھا جاسکتا ہے۔ ہم لبنان کا پوری قوت کے ساتھ دفاع کریں گے اور اس کے لیے ہرقیمت ادا کرنے کے لیے تیار ہیں۔
انہوں نے کہا کہ اسرائیل کے خلاف مسلح جدو جہد قطعی اور اٹل فیصلہ ہے۔ ماضی میں ہمارے شہداء نے اپنی جانوں کے نذرانے پیش کرکے دشمن کو شکست فاش سے دوچار کیا۔ حزب اللہ نے ماضی میں بھی فتوحات حاصل کیں اور آج بھی دشمن کے خلاف ہرسطح پر مزاحمت کرنے کے لیے تیار ہے۔
انہوں نے انکشاف کیا کہ اسرائیلی دشمن لبنانی مزاحمتی قوتوں اور لبنانی فوج کو جدید ترین اسلحہ اور میزائلوں کے حصول سے محروم رکھنے کے لیے امریکا کے ذریعے دبائو ڈالنے کی کوشش کررہا ہے۔
حسن نصراللہ کا کہنا تھا کہ اسرائیلی وزیراعظم بنجمن نیتن یاھو نے تسلیم کیا ہے کہ طاقت ہی اصل کامیابی ہے۔ قبضہ کامیابی نہیں۔ ان کا کہناتھا کہ نیتن یاھو کو مزاحمت کی طاقت سے مسئلہ ہے۔
