فلسطین کے علاقے میں چند روز کشیدگی میں معمولی کمی کے بعد گذشتہ شام اسرائیلی فوج نے حملہ کر کے کم سے کم سات فلسطینی شہید کردیے۔ دوسری جانب اسرائیل نے غزہ کی پٹی سے جنوبی اسرائیل پر 7 راکٹ داغنے کا دعویٰ کیا ہے۔
مرکز اطلاعات فلسطین کے مطابق اسرائیلی فوج نے خان یونس کے مقام پر شہر کے اندر داخل ہو کر ایک مزاحمت کار کی گرفتاری کی کوشش کی جس پر جھڑپ ہوگئی۔
اس دوران اسرائیلی فوج اور فلسطینیوں کے درمیان جھڑپ ہوگئی۔ جھڑپ اور اسرائیلی فوج کے فضائی حملے میں 7 فلسطینیوں کے مارے جانے کی اطلاعات ہیں۔
شہید ہونے والے فلسطینیوں کی ناخت 37 سالہ نورالدین محمد سلامہ، 23 سالہ محمد ماجد موسیٰ القرا، 22 سالہ علاء الدین محمد قویدر، 21 سالہ مصطفیٰ ابو عودہ، 25 سالہ محمود عطا اللہ مصبحم 24 سالہ علاء الدین فوزی فیسفس اور 21 سالہ عمر ناجی مسلم ابو خاطر کے ناموں سے کی گئی ہے۔
مقامی فلسطینی ذرائع کے مطابق قابض فوج نے خان یونس میں 40 مقامات پر فضائی حملے کیے جس کے نتیجے میں کئی عمارتوں کو شدید نقصان پہنچا۔
اسرائیلی ذرائع ابلاغ کے مطابق دفاعی شیلڈ "آئرن ڈوم” نے غزہ سے داغے دو راکٹ فضاء میں تباہ کر دیے۔
غزہ کی پٹی میں تازہ کشیدگی کے بعد اسرائیلی وزیراعظم بنجمن نینت یاھو اپنا فرانس کا دورہ مختصر کر کے واپس آگئے ہیں۔ اسرائیل کے غزہ کی سرحد کے قریب واقع یہودی کالونیوں میں تعلیمی ادارے بند رکھنے کا اعلان کیا ہے۔
فلسطینیوں کی جوابی کارروائی میں اسرائیلی فوج کا ایک افسر ہلاک اور ایک زخمی ہوگیا۔
مقامی ذرائع نے بتایا کہ خزاعہ کے مقام پر فولکس ویگن پک مجاھدین کے ایک گروپ کی طرف بڑھنے لگی تو اس پر مجاھدین نے فائرنگ کی۔ اسی دوران اسرائیلی فوج کے جنگی طیارے بھی فضا میں پہنچ آئے اور انہوں نے فضائی حملے شروع کردیے۔ جس کے نتیجے میں متعدد فلسطینی شہید اور زخمی ہوگئے۔ زخمیوں کو اسپتال منتقل کردیا گیا ہے۔ ان میں سے بعض کی حالت خطرناک بتائی جاتی ہے۔
