اسلامی تحریک مزاحمت "حماس” کے عسکری ونگ عزالدین القسام بریگیڈ نے ایک بیان میں کہا ہے کہ گذشتہ روز اسرائیلی فوج نے غزہ کی پٹی پر حملے کا خطرناک منصوبہ بنایا تھا مگر فلسطینی مجاھدین نے دشمن کو بھاگنے پر مجبور کرکے غزہ میں قتل عام کی سازش ناکام بنا دی۔
مرکزاطلاعات فلسطین کے مطابق القسام بریگیڈ کی طرف سے جاری کیے گئے ایک بیان میں کہا گیا ہے کہ حماس نے غزہ میں بزدل صہیونی دشمن کا ایک خطرناک منصوبہ اور دہشت گردی کی شازش ناکام بنا دی۔
بیان میں کہا گیا ہے کہ صہیونی فوج فلسطینی مجاھدین کی کامیابیوں کو ناکامی سے دوچار کرنا چاہتی تھی۔ دشمن غزہ کی پٹی میں افراتفری پھیلانے اور بدامنی کو ہوا دینے کی کوشش کررہا تھا مگر مجاھدین نے اپنی جانوں پر کھیل کر دشمن کو غزہ سے نکلنے پر مجبور کردیا۔
خیال رہے کہ گذشتہ روز اسرائیلی فوج نے غزہ کی پٹی میں گھس کر ایک کارروائی میں سات فلسطینیوں کو شہید اور متعدد کو زخمی کردیاتھا۔ اس کارروائی میں اسرائیلی فوج کا ایک افسر بھی جھنم واصل ہوا جب کہ ایک زخمی ہوا ہے۔
