قابض اسرائیلی فوج نے فلسطین کے مقبوضہ مغربی کنارے کے جنوبی شہر الخلیل میں ایک فلسطینی نوجوان کو گولیاں مار کر شہید کر دیا۔
مرکزاطلاعات فلسطین کے مطابق صہیونی فوج کی طرف سے دعویٰ کیا گیا ہے کہ فلسطینی نوجوان کو اس وقت گولیاں ماری گئیں جب اس نے الخلیل میں ایک یہودی آباد کار پر چاقو سے حملے کی کوشش کی۔
دوسری جانب فلسطینی وزارت صحت نے صہیونی فوج کے اس دعوے کو مسترد کر دیا ہے کہ فلسطینی کو چاقو حملے کے الزام میں گولیاں ماری گئیں۔
وزارت صحت کے مطابق قابض فوج نے فلسطینی شہری کو مسجد ابراہیمی کے قریب گولیاں مار کر شہید کیا۔
مرکزاطلاعات فلسطین کے نامہ نگار کے مطابق شہید فلسطینی نوجوان کی شناخت معمر عریف الاطرش کے نام سے کی گئی ہے جس کی عمر 42 سال بتائی جاتی ہے۔ شہید سات بچوں کا والد ہے۔
