مسجد اقصیٰ کے ڈائریکٹر اور سرکردہ عالم دین الشیخ عمر الکسوانی نے خبردار کیا ہے کہ اسرائیل نے قبلہ اول اور اس کے تمام اہم مقامات کو غاصب اور شرپسند یہودیوں کے لیے مباح قرار دے رکھا ہے۔ ان کا کہنا ہے کہ مسجد اقصیٰ کے تقدس کو غاصب صہیونیوں کے ہاتھوں خطرناک مذہبی جارحیت کا سامنا ہے۔
مرکزاطلاعات فلسطین سے بات کرتے ہوئے انہوں نے بتایا کہ جمعرات کو 1143 یہودی آباد کاروں نے قبلہ اول میں گھس کر تلمودی تعلیمات کے مطابق مذہبی رسومات ادا کیں۔ یہودیوں کو اسرائیلی فوج اور پولیس کی طرف سے فول پروف سیکیورٹی مہیا کی گئی تھی۔
الکسوانی کا کہنا تھا ک جمعرات کو علی الصباح 924 یہودی قبلہ اول میں داخل ہوئے اور مذہبی رسومات کی ادائی کی آڑ میں مقدس مقام کی بے حرمتی کا ارتکاب کیا۔ شام کے اوقات میں اسرائیلی پولیس کی سیکیورٹی میں مزید 210 یہودی قبلہ اول میں داخل ہوئے۔ ان میں اسرائیلی فوج کے تین سینیر افسران اور انتہا پسند یہودی ارکان کنیسٹ بھی شامل تھے۔
الکسوانی نے کہا کہ یہویوں کے مذہبی تہوار’عید العرش‘ کے آغاز سے اب تک ہزاروں یہودی قبلہ اول پر دھاوے بول کر مقدس مقام کے بے حرمتی کے مرتکب ہو چکے ہیں۔ ان کا کہنا تھا کہ اسرائیلی پولیس کی فول پروف سیکیورٹی میں یہودی آباد کار انفرادی اور اجتماعی طورپر قبلہ اول کے بے حرمتی کے مرتکب ہیں۔
