فلسطین کی تاجر ایسوسی ایشن نے غزہ کی پٹی اور غرب اردن کے درمیان تجارتی آمد ورفت کے لیے استعمال ہونے والی ’کرم ابو سالم‘ گذرگاہ کی بندش کے باعث غزہ کی پٹی کے عوام کو درپیش مشکلات کے حوالے سے گہری تشویش کا اظہار کیا ہے۔
مرکزاطلاعات فلسطین کے مطابق فلسطینی تاجر ایسوسی ایشن کے چیئرمین علی الحایک نے کرم ابو سالم گذرگاہ کو فوری طورپر کھولنے اور تجارتی سامان کی ترسیل پر پابندیاں اٹھانے کا مطالبہ کیا ہے۔
غزہ میں ایک پریس کانفرنس سے خطاب میں الحایککا کہنا تھا کہ کرم ابو سالم گذرگاہ کی بندش کے نتیجے میں غزہ کی پٹی کے عوام حساس اور خطرناک مرحلے میں داخل ہوگئے ہیں۔ اسرائیل کی طرف سے کرم ابو سالم گذرگاہ کی بندش کے باعث غزہ کے عوام کو کروڑوں ڈالر کا نقصان پہنچ رہا ہے۔ گذرگاہ کی بندش سے عام شہری اور تاجر برادری دونوں ہی بری طرح متاثر ہو رہے ہیں۔
خیال رہے کہ اسرائیلی حکومت نے گذشتہ ماہ غزہ کی پٹی پر پابندیاں مزید سخت کرتے ہوئے غزہ کی واحد تجارتی راہ داری کرم ابو سالم کو دو طرفہ تجارتی ٹریفک کے لیے بند کردیا تھا۔ یہ گذرگاہ بدستور بند ہے جس کے نتیجے میں غزہ کی پٹی میں ایندھن سمیت دیگر بنیادی ضروریات کا بحران پیدا ہوگیا ہے۔
