فلسطین کے مقبوضہ مغربی کنارے میں قائم یہودی کالونیوں کی آڑ میں غاصبانہ قبضہ مستحکم کرنے کے لیے صہیونی ریاست کئی طرح کے حربےاستعمال کر رہی ہے۔ اس سلسلے میں ایک تازہ حربہ ٹیلی کام کے شعبے میں نام نہاد منصوبے ہیں جن کا آغاز حال ہی میں کیا گیا ہے۔
اسرائیل کے عبرانی ٹی وی چینل 7 کی رپورٹ میں بتایا گیا ہے کہ صہیونی ریاست نے غرب اردن میں قائم یہودی کالونیوں میں موبائل ٹیلی فون اور ڈاک کے شعبے کو منظم کرنے کے لیے 30 ملین شیکل [نو ملین امریکی ڈالر] کا بجٹ مختص کیا ہے۔ مبصرین کا کہنا ہے کہ پوسٹل سروسز اور موبائل فون نیٹ ورک کی سہولیات کی آڑ میں غرب اردن پرقبضہ مستحکم کرنےکی سازش کی جا رہی ہے۔
عبرانی ٹی وی چینل کےمطابق اسرائیل کے ٹیلی کام کے شعبے وزیر اور حکمران جماعت ’لیکوڈ‘ کے سینیر رہ نما نے غرب اردن میں قائم تمام یہودی کالونیوں کو پوسٹل سروس کے ذریعے باہم مربوط بنانے کے ایک منصوبے کی منظوری دی ہے۔ اب ان یہودی کالونیوں میں یہودی آباد کاروں کو ڈاک کی آمد ورترسیل کے لیے ڈاک خانوں تک جانے کے بجائے یہ سہولت ان کے گھر کی دہلیز پر پہنچائی جائے گی۔
اسی طرح صہیونی حکومت نے غرب اردن کی یہودی کالونیوں میں نئے موبائل نیٹ ورک کے منصوبے پر کام شروع کرنے کا اعلان کیا ہے۔
اسرائیلی وزیر ٹرانسپورٹ یسرائیل کاٹز کا کہنا ہے کہ وہ غرب اردن کی یہودی کالونیوں کو ایک دوسرے سے مربط بنانے کے لیے 475 کلو میٹر طویل ریلوے لائن منصوبے پر کام کررہے ہیں۔
