اسرائیلی حکام نے زیرحراست ایک فلسطینی اسیرہ کی مدت حراست میں مزید توسیع کردی ہے جب کہ ایک مریض اسیر کی حالت خراب ہونے کے بعد اسے جیل کی اسپتال منتقل کیا گیا ہے۔
فلسطینی محکمہ امور اسیران کی طرف سے جاری کردہ ایک بیان میں کہا گیا ہے کہ ’عسقلان‘ کی فوجی عدالت نے اسیرہ صفاء ابو حسین کی مدت حراست میں مزید آٹھ دن کی توسیع کی ہے اور اسے ریمانڈ پر پولیس کے حوالے کردیا گیا ہے۔ صفاء حسین کا تعلق مقبوضہ مغربی کنارے کے جنوبی شہر الخلیل سے ہے۔
بیان میں مزید کہا گیا ہے کہ اسرائیلی جیل میں قید 35 سالہ ایاد احمد موسیٰ حریبات کو ’عسقلان‘ جیل سے الرملہ اسپتال منتقل کیا گیا ہے۔ حریبات کا تعلق الخلیل شہر کے علاقے دورا سے ہے اور وہ سنہ 2014ء سے پابند سلاسل ہے۔
شدید بیماری کے باعث اسیر حریبات اپنی مدد آپ کے تحت ٹوائلٹ بھی نہیں جاسکتا اور قضائے حاجت کرنے سے بھی قاصر ہے۔
خیال رہے کہ اسرائیلی زندانوں میں قید چھ ہزار فلسطینیوں میں 54 خواتین، 350 بچے اور 430 انتظامی قیدی ہیں جب کہ سیکڑوں فلسطینی اسیر مختلف امراض کا بھی شکار ہیں جو بیماری اور اسیری کےساتھ صہیونی ریاست کی مجرمانہ غفلت کا بھی شکار ہیں۔
