جنوبی امریکی ملک گوئٹے مالا کی جانب سے اسرائیل میں قائم اپنے سفارت خانے کو مقبوضہ بیت المقدس منتقل کرنے پر عرب لیگ نے گوئٹے مالا سے 2013ء میں طے پایا مفاہمتی معادہ منسوخ کردیا ہے۔
مرکزاطلاعات فلسطین کے مطابق عرب لیگ کے ترجمان محمود عفیفی نے ایک بیان میں بتایا کہ لیگ کے سیکرٹری جنرل احمد ابو الغیط کے احکامات کے بعد گوئٹے مالا کے ساتھ طے پایا مفاہمتی معاہدہ ختم کردیا ہے۔ اس معاہدے میں طے پایا تھا کہ گوئٹے مالا یک طرفہ طورپر ایسا کوئی قدم نہیں اٹھائے گا جس پر عرب لیگ کو اعتراض ہو۔ گوئٹے مالا نے اس معاہدے کا پاس نہیں کیا اس لیے عرب لیگ اسے ختم کرنے پر مجبور ہے۔
ترجمان نے کہا کہ عرب لیگ گوئٹے مالا اور دوسرے ممالک کی طرف سے اپنے سفارت خانوں کی تل ابیب سے القدس منتقلی کی شدید مذمت کرتے ہوئے انہیں امن مساعی کی راہ میں ایک نئی رکاوٹ قرار دیتی ہے۔
خیال رہے کہ حال ہی میں امریکا نے تل ابیب سے اپنا سفارت خانہ القدس منتقل کیا جس کے بعد گوئٹے مالا اور بعض دوسرے ملکوں نے بھی امریکا کی پیروی کرتے ہوئے اپنے سفارت خانے مقبوضہ بیت المقدس منتقل کرنے کا سلسلہ شروع کیا ہے۔
