مصر کی جانب سے انسانی حقوق کے کارکنوں اور امدادی اداروں کی جانب سے خوراک اور ادیات کی کھیپ لے کر ایک قافلہ فلسطین کے علاقے غزہ پہنچ گیا ہے۔
الشرق الاوسط نیوز ایجنسی کے مطابق امدادی قافلہ ہفتے کے روز غزہ کی پٹی میں داخل ہوا۔ امدادی سامان میں ادویات، علاج کے لیے استعمال ہونے والا طبی سامان اور خوراک شامل ہے۔
اس کے علاوہ مصر کے شہروں العریش، اسماعیلیہ اور قاہرہ سے ایمبولینسیں بھی غزہ بھیجی گئی ہیں تاکہ غزہ کے اسپتالوں میں زیرعلاج زخمیوں کو مصری اسپتالوں میں علاج کے لیے لے جایا جاسکے۔
خیال رہے کہ گذشتہ سوموار 14 مئی کو اسرائیلی فوج نے غزہ کی پٹی میں ریاستی دہشت گردی کا مظاہرہ کرتے ہوئے 63 فلسطینی شہریوں کو شہید اور تین ہزار سے زاید کو زخمی کردیا تھا۔ اس سے قبل 30 مارچ سے جاری تحریک حق واپسی میں اسرائیلی فوج اب تک 119 فلسطینی شہریوں کو شہید اور ہزاروں کو زخمی کرچکی ہے۔
