فلسطینی محکمہ صحت کی طرف سے جاری کردہ ایک رپورٹ میں بتایا گیا ہے کہ غزہ کی پٹی میں زخمیوں کی تعداد میں اضافے کے باعث ہزاروں کی تعداد میں ضروری سرجری کے کیسز میں تاخیر ہوئی ہے۔
مرکزاطلاعات فلسطین کے مطابق غزہ کی پٹی میں حالیہ ایام میں مشرقی سرحد پرجمع ہونے والے مظاہرین پر اسرائیلی فوج کی فائرنگ سے بڑی تعداد میں فلسطینی زخمی ہوئے ہیں۔
غزہ کی پٹی میں اسپتالوں کے ڈائریکٹر ڈاکٹر عبدالطیف الحاج نے بتایا کہ غزہ میں سیکڑوں مظاہرین کے زخمی ہونے کے باعث غزہ میں چار ہزار سرجری کیسز تاخیر کا شکار ہوئے ہیں۔
ان کا کہنا تھا کہ غزہ میں قائم اسپتالوں میں پہلے ہی طبی سہولیات کا فقدان ہے۔ میڈیا رپورٹس کے مطابق غزہ کی پٹی کے اسپتالوں میں زخمیوں کی تعداد میں چار گنا اضافہ ہوا ہے جس کے نتیجے میں اسپتال زخمیوں سے بھر گئے ہیں۔
خیال رہے کہ تیس مارچ کے بعد سے غزہ کی مشرقی سرحد پر جاری واپسی احتجاجی ریلیوں کے دوران اسرائیلی فوج کی طرف سے تشدد کے استعمال سے چار ہزار سے زاید شہری زخمی ہوچکے ہیں۔
