فلسطین میں 30 مارچ کو شروع ہونے والی چھ ہفتوں پر مشتمل حق واپسی تحریک اپنے تیسرے ہفتے میں جاری ہے۔ دوسری جانب اس تحریک کو عالمی حمایت دلانے کے لیے فلسطینی اور عالمی سماجی کارکن دوسرے ممالک میں بھی مہمات جاری رکھے ہوئے ہیں۔
مرکزاطلاعات فلسطین کے مطابق براعظم یورپ میں پھیلے فلسطینی ’حق واپسی‘ تحریک کی حمایت کے لیے یورپی ملکوں میں تقریبات، ریلیوں اور سیمینار کا اہتمام کررہے ہیں۔
برسلز میں ہونے والی ایک احتجاجی ریلی میں مقامی شہریوں کی بڑی تعداد نے شرکت کی۔ ریلی میں شریک شہریوں نے فلسطینیوں کے حق واپسی کی حمایت پرمبنی نعروں پرمشتمل بینرز اٹھا رکھے تھے۔ انہوں نے غزہ کی پٹی کا محاصرہ ختم کرنے، غزہ میں انسانی بحران کے حل کے لیے فوری اقدامات، اسرائیلی جیلوں میں قید فلسطینیوں کو ان کے حقوق فراہم کرنے اور فلسطینیوں کے حق واپسی کے حق میں نعروں پرمشتمل بینرز اٹھا رکھے تھے۔
ہفتے کے روز ہالینڈ کے شہر روٹر ڈام میں ایک بڑی ریلی نکالی گئی۔ یہ رلی ’موومنٹ ایکس‘ نامی تنظیم کی معاونت سے نکالی گئی۔
ریلی میں یورپی ملکوں میں مقیم فلسطینیوں کی بڑی تعداد نے شرکت کی۔ مظاہرین نے مشرقی غزہ کی سرحد پر جمع ہونے فلسطینیوں کی مکمل حمایت اور تائید کا اعلان کیا۔ مظاہرین نے ہاتھوں میں غزہ میں اسرائیلی جارحیت سے شہید ہونے والے فلسطینی مظاہرین کی تصاویر بھی اٹھا رکھی تھیں۔
سویڈن کے شہر مالمو، جرمنی کے برلن اور دوسرے یورپی ملکوں میں فلسطینی پناہ گزینوں کے حق واپسی کی حمایت میں ریلیاں اور مظاہرے کیے گئے۔
