گزشتہ روز سیکڑوں یہودی آباد کاروں نے مسجد اقصیٰ کے باہر اور پرانے بیت المقدس شہر میں اشتعال انگیز ریلی نکالی۔ اس موقع پر انتہا پسند یہودی آباد کاروں کو اسرائیلی فوج اور پولیس کی طرف سے فول پروف سیکیورٹی مہیا کی گئی تھی۔
مرکز اطلاعات فلسطین کے مطابق مسجد اقصیٰ کے باہر نکالی جانے والی ریلی پر یہودی مذہبی مدارس کے سیکڑوں طلباء، شدت پسند تنظیموں’شفوبنیم‘، شفولشوناہ، عطیرت کوھنیم اور العاد کے ارکان بھی شامل تھے۔ یہ ریلی جمعرات کی شام مقامی وقت کے مطابق چھ بجے نکالی گئی۔ یہ ریلی مسجد اقصیٰ کے باب العامود سے شروع ہو کر واد، باب السوق القطانین اور مسجد کے دیگر دروازوں سے گزر کر پرانے بیت المقدس میں جا کر ختم ہوئی۔
یہودی آباد کاروں نے اسرائیلی ریاست کے پرچم، بینرز اور کتبے اٹھا رکھے تھے۔ بینروں اور کتبوں پرمسلمانوں، فلسطینیوں اور عربوں کے خلاف اشتعال انگیز نعرے درج تھے۔
اس موقع پر یہودی آباد کاروں نے مسجد اقصیٰ کی جگہ ہیکل سلیمانی کی تعمیر کے حق میں بھی نعرے بازی کی۔
