امریکی حکومت نے شام میں صدر بشارالاسد کی فوج کے خلاف فوجی کارروائی کا عندیہ ظاہر کیا ہے۔
ایک سینئر امریکی عہدے دار کا کہنا ہے کہ شام میں نئے کیمیائی حملے ہونے کے الزامات کے بعد ان کے ملک کی وہاں فوجی کارروائی خارج از امکان نہیں۔
مذکوہ عہدے دار نے جمعرات کے روز بتایا کہ بشار الاسد کی حکومت اور داعش تنظیم کی جانب سے "کیمیائی ہتھیاروں” کا استعمال جاری ہے۔
یہ بیان سیرین اور کلورین کے نئے حملوں کے بارے میں رپورٹیں سامنے آنے کے بعد جاری ہوا ہے۔ اس حوالے سے دمشق کے مشرق میں محصور شہر دوما پر کیمیائی حملے کی تصدیق ابھی نہیں ہو سکی۔
امریکا میں نمایاں عہدے داران نے جمعرات کے روز بتایا کہ اگر ضرورت ہوئی تو صدر ڈونلڈ ٹرمپ کی انتظامیہ شامی فوج کے خلاف ایک اور عسکری کارروائی کے لیے تیار ہے تا کہ اسے کیمیائی ہتھیاروں کے استعمال سے باز رکھا جا سکے۔
ایک عہدے دار نے اپنا نام ذکر نہ کرنے کی درخواست پر بتایا کہ اگر عالمی برادری کی جانب سے بشار الاسد پر دباؤ جلد از جلد نہ بڑھایا گیا تو شامی کیمیائی ہتھیار پھیل جائیں گے اور شاید امریکا تک بھی پہنچ جائیں۔
ادھر امریکی وزارت خارجہ کی ترجمان ہیدر نوورٹ نے جمعرات کے روز کہا کہ امریکا کو اس رپورٹ پر "انتہائی تشویش” ہے جس میں کہا گیا ہے کہ شامی فورسز نے حال ہی میں مشرقی غوطہ پر حملوں میں کلورین گیس کو بطور ہتھیار استعمال کیا۔
