اٹلی کی ایک فیملی عدالت نے ایک خاتون کو اپنے 16 سالہ لڑکے کے ساتھ حد سے زیادہ محبت کرنے کی پاداش میں 10 ہزار یورو جرمانے کی وارننگ دی ہے۔ عدالت نے خاتون کو حکم دیا ہے کہ وہ بیٹے کی اجازت کےبغیر اس کی تصاویر ’فیس بک‘ پرپوسٹ نہ کرے۔
اخبار ’ڈیلی میل‘ کے مطابق اطالوی عدالت نے خاتون کو حکم دیا ہے کہ وہ فیس بک پر اپنے بیٹے کی تمام تصاویر ہٹا دے اور آج کے بعد بیٹے کی اجازت کے بغیر اس کی کوئی تصویر پوسٹ نہ کرے۔ اگر اس نے دوبارہ لڑکے کی کوئی تصویر پوسٹ کی تو اسے10 ہزار یورو جرمانہ ادا کرنا پڑسکتا ہے۔
عدالت میں ایک 16 سالہ لڑکے نے اپنے ماں کے خلاف دعویٰ دائر کیا تھا جس میں اس کا کہنا تھا کہ اس کی ماں اس کی اجازت کے بغیر اس کی تصاویر اپنے فیس بک صفحے پر پوسٹ کرتی ہے۔
عدالت نے ماں اور اس کے بیٹے کو ایک دوسرے سے دور کردیا ہے۔ لڑکے کا کہنا ہے کہ ماں نے انٹرنیٹ پر اس سے محبت میں مبالغہ آرائی سے کام لینا شروع کیا ہے جس سے وہ بہت پریشان اور مایوس ہوا ہے۔
خیال رہے کہ اٹلی میں کسی شخص کی تصویر اس کی مرضی کے خلاف سوشل میڈیا پر پوسٹ کرنا کاپی رائیٹ کی خلاف ورزی سمجھا جاتا ہے اور اس کی سزا ہزاروں یورو جرمانہ مقرر ہے۔
