بھارت کے ایک سرکردہ مسلمان مذہبی رہ نما مولانا سید جلال حیدر نقوی نے امریکی صدر ڈونلڈ ٹرمپ کو عالم اسلام کا بدترین دشمن قرار دیا ہے۔ انہوں نے بیت المقدس کو اسرائیل کا دارالحکومت تسلیم کرنے پر ڈونلڈ ٹرمپ کا عالمی عدالتوں میں ٹرائل کا مطالبہ کیا۔
مرکز اطلاعات فلسطین کے مطابق نئی دہلی میں القدس کے ساتھ اظہار یکجہتی کے لیے نکالی گئی ایک ریلی سے خطاب میں علامہ جلال الدین نقوی نے کہا کہ ڈونلڈ ٹرمپ کے ’اعلان القدس‘ پر پورا عالم اسلام صدمے میں ہے۔ یہ عظیم الشان احتجاجی مارچ ٹرمپ کےاعلان القدس کے خلاف بھارتی مسلمانوں کی طرف سے یہ پیغام ہے کہ عالم اسلام القدس کے حوالےسے امریکی۔ صہیونی گٹھ جوڑ کو کسی قیمت پر قبول نہیں کریں گے۔
انہوں نے کہا کی بھارت کے مسلمان ٹرمپ اور اسرائیل کے جارحانہ عزائم کے خلاف اور مظلوم فلسطینی قوم کے ساتھ ہیں۔
خیال رہے کہ گذشتہ روز نئی دہلی میں بھارت کے شیعہ اور مسلمان رہ نماؤں نے مشترکہ طور پر القدس مارچ کا انعقاد کیا تھا۔ جلوس میں ہزاروں شیعہ اور سنی مسلمانوں نے شرکت کی۔
جلسے سے خطاب کرتے ہوئے علامہ جلال الدین نقوی نے کہا کہ ڈونلڈ ٹرمپ نے بیت المقدس کو اسرائیل کا دارالحکومت قرار دے کر عالم اسلام کے خلاف اپنی دشمنی کا کھلا ثبوت دےدیا ہے۔ مسلم ممالک کو چاہیے کہ وہ ٹرمپ کے خلاف عالمی عدالتوں میں مقدمات چلائیں۔
