اقوام متحدہ کے سیکرٹری جنرل انتونیو گوٹیریس نے خبردار کیا ہے کہ لبنانی شیعہ ملیشیا حزب اللہ اور اسرائیل کے درمیان کسی بھی وقت جنگ چھڑ سکتی ہے۔
غیرملکی خبررساں اداروں کی رپورٹس کے مطابق اقوام متحدہ کے سیکرٹری جنرل نے جنرل اسمبلی کے اجلاس میں تقسیم کی گئی ایک رپورٹ میں کہا ہے کہ حزب اللہ اوراسرائیل کے درمیان جنگ کے خطرات بڑھ رہے ہیں۔ دونوں فریق ایک دوسرے کےخلاف دھمکی آمیز بیانات استعمال کررہے ہیں، جس کے نتیجےمیں دونوں فریقین کے درمیان جنگ کے خطرات بڑھ رہے ہیں۔
اقوام متحدہ کے سربراہ نے اسرائیل اور حزب اللہ پر صبرو تحمل سے کام لینے اور ایک دوسرے کے خلاف طاقت کے استعمال کی زبان استعمال کرنے سے گریز کی پالیسی اپنانے پر زور دیا ہے۔
خیال رہے کہ 12 جولائی 2006ء حزب اللہ اور اسرائیل کے درمیان کئی ہفتے تک جنگ جاری رہی تھی جس میں لبنان میں وسیع پیمانے پر تباہی ہوئی تھی۔
