اسرائیلی حکومت وزیر دفاع کے اختیارات میں اضافے کے ایک نئے مسودے پر ٖغور کررہی ہے جس کی منظوری کے بعد وزیردفاع کو غیرمعمولی اختیارات حاصل ہوں گے اور وہ فلسطینیوں پر عرصہ حیات تنگ کرنے کے لیے نئے احکامات صادر کرسکے گا۔
مرکزاطلاعات فلسطین کے مطابق اسرائیلی کابینہ ایک نئے مسودہ قانون پر غور کررہی ہے۔ اس مسودے کے تحت وزیر دفاع کو مزید انتظامی اختیارات دیے جائیں گے۔
عبرانی اخبار ’ہارٹز‘ کے مطابق وزیر دفاع کے اختیارات میں اضافے کا مقصد فلسطینی مزاحمت کاروں کو اسرائیل کے خلاف کارروائیوں سے روکنے کے لیے مزید سخت ترین اقدامات کرنا ہے۔
کابینہ سے منظوری کے بعد نیا بل اسرائیلی کنیسٹ [پارلیمنٹ] میں پیش کیا جائے گا، پارلیمنٹ پہلی اور دوسری رائے شماری کے بعد اسے ایک قانون کی شکل دے گی۔
اس نئے نام نہاد قانون کی منظوری کے بعد اسرائیلی وزیر دفاع کو کسی بھی فلسطین کو کوئی خاص ملازمت کرنے سے روکنے، کسی خاص علاقے تک محدود رکھنے، یا اسے کسی علاقے سے بے دخل کرنے، سفر پر پابندی عاید کرنے یا مخصوص لوگوں کے ساتھ رابطے کرنے کے اختیارات حاصل ہوں گے۔
انسانی حقوق کی تنظٰیموں نے مجوزہ قانونی بل پر کڑی تنقید کی ہے اور کہا ہے کہ وزیر دفاع کے اختیارات میں توسیع فلسطینی شہریوں کی آزادی اور بنیادی حقوق سلب کرنے کی ایک نئی صہیونی چال ہے۔
