تحریک فتح کی ایگزیکٹو کمیٹی کے ایک سینیر رکن اور جماعت کے مرکزی رہ نما واصل ابو یوسف نے ایک بیان میں کہا ہے کہ تمام فلسطینی جماعتوں کا ایک نمائندہ اجلاس جلد مصر کے دارالحکومت قاہرہ میں ہوگا۔ ان کا کہنا ہے کہ تمام جماعتیں مصر میں قومی حکومت کی تشکیل، پارلیمانی اور صدارتی انتخابات کی تیاری اور منصوبہ بندی کے لیے جلد ہی مصر کا دورہ کریں گی۔
مرکزاطلاعات فلسطین کے مطابق ایک انٹرویو میں واصل ابو یوسف نے کہا کہ تمام فلسطینی دھڑے گیارہ سال سے جاری اختلافات کو بھلا کر تمام ذمہ داریاں قومی حکومت کو دینے کے لیے تیار ہیں۔
انہوں نے کہا کہ آئندہ ہفتے اسلامی تحریک مزاحمت ’حماس‘ اور تحریک فتح کے مندوبین کا قاہرہ میں اجلاس متوقع ہے۔ اس کے علاوہ اس اجلاس میں دوسری فلسطینی جماعتیں بھی شرکت کریں گی۔
ایک سوال کے جواب میں تحریک فتح کے رہ نما نے کہا کہ قاہرہ میں جمع ہونے والی فلسطینی سیاسی قیادت ملک میں قومی حکومت کی تشکیل، پارلیمانی اور صدارتی انتخابات کے لیے تیاریوں کے حوالے سے لائحہ عمل طے کرے گی۔
فلسطین میں نیشنل کونسل کے اجلاس اور کونسل کی نئی باڈی کے انتخاب کےحوالے سے ابو یوسف نے کہا کہ اس موضوع پر فی الحال مشاورت جاری ہے۔ حماس اور فتح کی قیادت نیشنل کونسل کے اجلاس کے حوالے سے بھی مشاورت کررہی ہیں۔ دوسری جماعتوں کو بھی مشاورت میں شامل کیا جا رہا ہے۔
