فلسطین کے مقبوضہ مغربی کنارے کے شمالی شہر جنین میں گذشتہ شام ایک یہودی کالونی کے قریب زور دار بم دھماکے کی اطلاعات ہیں تاہم اس دھماکے کے نتیجے میں کسی قسم کا جانی نقصان نہیں ہوا ہے۔
اسرائیلی فوج کی طرف سے جاری کردہ ایک بیان میں بتایا گیا ہے کہ غرب اردن کے شمالی شہر جنین میں واقع ’میفو دوتھان‘ کالونی عرابہ اور یعبد قصبات کے درمیان ایک زور دار دھماکہ ہوا۔ حکام نے جائے وقوعہ پر پہنچ کر دھماکے کے نوعیت کا جائزہ لیا ہے۔
عبرانی اخبار ’یدیعوت احرونوت‘ کی رپورٹ میں بتایا گیا ہے کہ بم دھماکے میں دیسی ساختہ بارود استعمال کیا گیا۔ میفو دوتھان کالونی کے باہر ہونےوالے اس دھماکے میں کسی قسم کا جانی یا مالی نقصان نہیں ہوا ہے۔
واقعے کے بعد اسرائیلی فوج نے پورے علاقے کو گھیرے میں لے کر سرچ آپریشن شروع کردیا تھا۔
خیال رہے کہ میفو دوتھان یہودی کالونی سنہ 1982ء میں عرابہ اور یعبد قصبے میں قائم کی گئی تھی۔ یہ کالونی یہودی آباد کاری میں سرگرم ’گوش ایمونیم‘ موومنٹ نے قائم کی تھی۔
