یہ تو مشہور ہے کہ چور کسی جگہ چوری کرنے کی غرض سے گھسے تواسے سب سے زیادہ اپنی جان کی فکر لاحق ہوتی ہے اور وہ تیزی کے ساتھ چیزیں چوری کرنے کے بعد راہ فرار اختیار کرنے کی کوشش کرتا ہے، مگر روس میں ایک شخص چوری کے لیے کسی مکان میں گھسا تو وہاں اسے شراب ملی۔ اس نے شراب پی اور وہیں سو گیا۔
مرکزاطلاعات فلسطین کے مطابق یہ واقعہ حال ہی میں روسی شہر استراخان میں پیش آیا۔
پولیس کے مطابق چور نے فوڈکا نامی شراب پی اور اس کے بعد اسے چوری کا خیال نہ رہا اور وہیں سوتا رہا۔
مکان میں رہائش پذیر افراد نے دیکھا کہ ایک اجنبی اور مشکوک شخص ایک کمرے کے صوفے پر خواب خرگوش ہے۔ انہوں نے اسے جگانے کے بجائے پولیس کو اطلاع دی۔
پولیس نے ملزم کو سوئے ہوئے جگایا اور تحقیق کی تو پتا چلا کہ وہ باورچی خانے کا دروازہ توڑ کر اندر داخل ہوا اور فوڈکا نامی شراب کی ایک بوتل پی جس کے بعد وہ ہوش میں نہ رہا۔ پولیس کا کہنا ہے کہ چوری کی غرض سے گھر میں داخل ہونےوالے 44 سالہ شخص نے شراب کی ایک بوتل پی صوفے کے ساتھ ٹیک لگائی اور سوگیا۔
پولیس نے ملزم کے خلاف چوری کی کوشش کے الزام میں مقدمہ درج کرلیا ہے۔
