اسلامی تحریک مزاحمت ’حماس‘ کے سیاسی شعبے کے نائب صدر ڈاکٹر موسیٰ ابو مرزوق کی قیادت میں جماعت کے ایک اعلیٰ اختیاراتی وفد نے ماسکو کا دورہ کیا ہے۔ گذشتہ روز حماس کے وفد نے ماسکو میں اعلیٰ روسی حکام کے ساتھ بات چیت کی۔
مرکزاطلاعات فلسطین کے مطابق روس کے دورے پرآنے والے حماس کے وفد میں جماعت کے سیاسی شعبے کے نایب صدر ڈاکٹر موسیٰ ابو مرزوق، سیاسی شعبے کے ارکان صالح العاروری، حسام بدران اور سامی خاطر شامل ہیں۔
حماس کے ترجمان حسام بدران نے قبل ازیں بتایا تھا کہ جماعت کا ایک اعلیٰ اختیاراتی وفد 18 ستمبرکو ماسکو کے سرکاری دورے پر جائے گا۔
ذرائع کے مطابق گذشتہ روز حماس کی قیادت اور روسی حکام کے درمیان ہونے والی بات چیت میں فلسطینی قوم کے خلاف صہیونی ریاست کی انتقامی پالیسیوں، فلسطین کی موجودہ صورت حال اور غزہ کی پٹی پر مسلط کی گئی معاشی پابندیوں اور ان کے تباہ کن اثرات پر بھی بات چیت کی گئی۔
