فلسطین کے مقبوضہ مغربی کنارے کے جنوبی شہر بیت لحم میں "The Walled Off Hotel‘‘ میں برطانوی آرٹیسٹ ’بانکسی‘ کے تیار کردہ دو فن پاروں کو دیکھ کر اہالیان بیت لحم حیران رہ گئے۔
بانکسی نے حسب سابق اپنی فنی مہارت کا مظاہرہ کرتے ہوئے ڈونلڈ ٹرمپ کا ایسا خاکہ تیار کیا جس سے ٹرمپ کی اسرائیل نوازی کا برملا اظہار ہوتا ہے۔ بانکسی کے ڈیزائن کردہ خاکوں میں سے ایک میں ڈونلڈ ٹرمپ کو غرب اردن میں قائم کردہ نسلی دیوار کے ساتھ کھڑے دیوار سے معانقہ کرتے دکھایا گیا ہے۔
دوسرے فن پارے میں انہیں اسرائیلی فوج کے قائم کردہ ایک کنٹرول ٹاور کے سامنے کھڑے دیکھا جاسکتا ہے۔ اگرچہ یہ دونوں کوئی حقیقی تصاویر تو نہیں بلکہ محض خاکے اور کارٹون ہیں مگر ان میں ایک ان سے ڈونلڈ ٹرمپ کی اسرائیل نوازی مترشح ہوتی ہے۔
خیال رہے کہ ایک گم نام برطانوی آرٹسٹ نے فلسطینیوں کے خلاف اسرائیلی ریاست کے مظالم کو اپنی فن کاری کے ذریعے تصویری خاکوں کے قالب میں ڈھال کر دنیا کے سامنے صہیونی بھیڑیوں کا مکروہ چہرہ منفرد اور اچھوتے انداز میں بے نقاب کیا ہے۔
شمالی بیت لحم سے اندر داخل ہوتے ہی دیوار فاصل سے صرف تین میٹر دور دنیا کا ایک انوکھا ہوٹل قائم ہے۔ یہ ہوٹل اپنے کھابوں اور انواع اقسام کے ماکولات و مشروبات کی وجہ سے مشہور نہیں بلکہ اپنے درو دیوار کی وجہ سے دنیا کی توجہ کا مرکز بنا ہوا ہے۔
برطانوی فن کار رابرٹ بانکسی نے کئی ماہ قبل انتہائی راز داری کے ساتھ اس ہوٹل کے اندرونی دور دیوار پر خاکوں اور تصاویر کی پینٹنگ شروع کی۔ ایک سال سے زاید عرصے کی ان تھک محنت اور کاوش کے بعد وہ اپنے مشن میں کامیاب وکامران ہوگیا۔ بانکسی کے دست ہنرسے تیار کردہ یہ ہوٹل دنیا کا ایک منفرد ہوٹل ہے جہاں لوگ کھانا کھانے کم مگر صہیونی ریاست کے مظالم کا جائزہ لینے زیادہ آتے ہیں۔
دنیا کے اس منفرد ہوٹل کے لیے اس کے بنانے والے برطانوی فن کار نے ’The Walled Off Hotel‘ رکھا ہے۔ یعنی کہ ’دیواروں کے حصار میں گھرا ہوٹل‘۔ جیسا کہ نام ہی سے ظاہر ہوتا ہے یہ ہوٹل اسرائیل کی قائم کردہ دیوار فاصل کے بیچ گھرا ہوا ہے۔ ہوٹل میں داخل ہونے والے زائرین کا استقبال ایک بندر کا مسجمہ کرتا ہے جس کی بغل میں ایک بڑا بیگ ہے۔ وہ زائرین کو خوش آمدید کہتا ہے۔ وہاں سے آگے قدم اٹھاتے ہی ہوٹل کے درو دیوار آپ سے باتیں کرتے اوران پر بنے خاکے اور تصاویر فلسطینیوں پرڈھائے جانے والے مظالم کی خاموش داستان سناتے ہیں۔
درو دیوار پر بنی ہر تصویر، خاکہ اور پینٹنگ فلسطینیوں کے خلاف اسرائیلی افواج کے مکروہ حربوں کی خاص پیرائے میں ترجمانی کرتی ہے، کہیں آنسوگیس کی شیلنگ کا عکس ہے اور تو کہیں مانیٹرنگ کی آڑ میں لگائے گئے کیمروں کی عکاسی ہے۔ کہیں اسرائیلی فوج فلسطینیوں پر گولیاں برسا رہی ہیں تو کہیں نہتے شہریوں کی گرفتاریوں کے ہولناک مناظر ہیں۔ کہیں اسرائیلی زندانوں میں قید فلسطینیوں پر مظالم ہیں تو کہیں فلسطینی بستیوں کے بیچ تیزی کے ساتھ پھیلتی یہودی آباد کاری اور دیوار فاصل کی نشاندہی کی گئی ہے۔ الغرض ہوٹل کے بیرونی حصے سے لے کر اندرونی گیلریوں، کمروں کی دیواروں پر فلسطینیوں کے خلاف انتقامی کارروائی کا کوئی نا کوئی تصویری خاکہ دکھائی دیتا ہے۔
مجموعی طور پر ہوٹل کے نو کمرے ہیں جن میں چھ فیملیاں سما سکتی ہیں۔ یہ ہوٹل سیاحوں کی توجہ کا مرکز ہے۔ ہوٹل کا راستہ بیت جالا سے ہو کر بیت لحم تک پہنچتا ہے۔
