قابض صہیونی فوج نے مسجد اقصیٰ کے باب الاسباط کے باہر نام نہاد سیکیورٹی قدغنیں عاید کرنے کے خلاف بہ طور احتجاج دھرنا دینے والے فلسطینیوں پر وحشیانہ تشدد کیا ہے جس کے نتیجے میں کئی شہری زخمی ہوگئے۔
مرکزاطلاعات فلسطین کے نامہ نگار کے مطابق قابض صہیونی فوج نے وحشیانہ طاقت کا استعمال کرتے ہوئے باب الاسباط کے باہر دھرنا دینے والے فلسطینیوں کو حرم قدسی کی دیواروں سے باہر دھکیل دیا۔ وحشیانہ تشدد کے نتیجے میں کئی مظاہرین زخمی بھی ہوئے ہیں۔
نامہ نگار کے مطابق اسرائیلی فوج کے وحشیانہ تشدد کے باوجود دسیوں مظاہرین اپنی جگہ پر جمے رہے اور انہوں نے دھرنا ختم کرنے سے انکار کردیا۔
خیال رہے کہ گذشتہ جمعہ کے بعد اسرائیلی فوج نے مسجد اقصیٰ میں اذان اور نماز کی ادائی پر پابندی عاید کر رکھی ہے۔ اس کے ساتھ ساتھ اسرائیلی فوج نے مسجد اقصیٰ میں داخلے کے لیے الیکٹرانک گیٹ نصب کرنے اور کیمرے لگانے کا سلسلہ شروع کیا ہے جس کے خلاف فلسطینی سراپا احتجاج ہیں۔ فلسطینی شہریوں نے اسرائیلی فوج کی طرف سے عاید کردہ پابندیوں اور نام نہاد سیکیورٹی اقدامات کو مسترد کردیا ہے۔
